Охират кунига тайёргарлик

Пайғамбаримиз с а в ҳадислари ва ҳукамоларнинг ҳикматлари асосида тайёрланган

Шайх Аҳмад ибн Ҳажар Али ал-Асқалоний

ОХИРАТ КУНИГА ТАЙЁРГАРЛИК (МУНАББИҲОТ)

Таржимонлар:

АБДУЛҲАЙ АБДУЛҲАФИЗ ўғли АҲМАД МУҲАММАД

«Мовароуннаҳр» Тошкент - 2005

Шайх Аҳмад ибн Ҳожар Али ал-Асқалоний (Мисрий) ҳижрий 772 йили Мисрнинг Асқалон диёрида таваллуд топганлар. Аллоҳнинг иродаси ва тақдирнинг тақозоси ила ул зотнинг болалик йиллари етимлик ранжларига омухта ўтди. Аммо меҳрибон Зот Аллоҳ таоло бўлажак алломага Қуръон азимуш-шаънни тўла ёд олиб қори бўлиш мансабини раво кўриб, эъзозлаб қўйди.

Асқалоний Қуръон илмида пешқадам бўлиш билан бир қаторда шариат илмини пухта эгалладилар, юртнинг уламо ва ҳукамоларидан мукаммал таҳсил олдилар. Айниқса, ҳадис фанининг алломаси Шайх Ҳофиз Абул-Фазл Ироқийдан дарс ўқиб ўз замонасининг етук муҳаддислари қаторидан жой олдилар. Имом Бухорийнинг «Саҳиҳ»ларига Асқалоний ёзган катта Фатҳул Борий номли шарҳ китоби муҳаддислар орасида машҳур. Умуман, аллома Саховийнинг ривоятларига кўра, Асқалоний фан, фиқҳ, ахлоқ-одобга доир бир юз элликдан зиёд китоб ва рисола тасниф этганлар. Ҳижрий 852 йили вафот этганлар.

Ҳукмингизга ҳавола этилган ушбу «Мунаббиҳот» рисоласи Пайғамбаримиз соллаллоҳу алайҳи васаллам ҳадислари ва ҳукамоларнинг ҳикматлари асосида тартиб берилган бўлиб, Мовароуннаҳр диёрларида ҳам машҳур бўлган ва мадрасаларда дарслик сифатида ўқитилган.